தமிழ்க்கருவூலம்

Wednesday, April 22, 2020

தமிழவைக்காலத்துச் சேர சோழ பாண்டிய அரசர்கள் பட்டியல் :

தமிழவைக்காலத்துச்சேரவரசர்கள் சிலர் :

௧. அந்துவஞ்சேரலிரும்பொறை
௨. ஆடுகோட்பாட்டுச்சேரலாதன்
௩. இமயவரம்பன் நெடுஞ்சேரலாதன்
௪. இளங்குட்டுவன்
௫. இளஞ்சேரலிரும்பொறை
௬. உதியஞ்சேரலாதன்
௭. கடல்பிறக்கோட்டிய செங்குட்டுவன்
௮. கணைக்காலிரும்பொறை
௯. கருவூரேறிய ஒள்வாட்கோப்பெருஞ்சேரலிரும்பொறை
௰. கருவூர்ச்சாத்தன்
௧௧. களங்காய்க்கண்ணி நார்முடிச்சேரல்
௧௨. குட்டுவன்கோதை
௧௩. கோக்கோதைமார்பன்
௧௪. கோட்டம்பலத்துத்துஞ்சிய மாக்கோதை
௧௫. செல்வக்கடுங்கோ வாழியாதன்
௧௬. தகடூரெறிந்த பெருஞ்சேரலிரும்பொறை
௧௭. நம்பி குட்டுவனார்
௧௮. பல்யானைச்செல்கெழு குட்டுவன்
௧௯. பாலைபாடிய பெருங்கடுங்கோ
௨௰. மருதம்பாடிய இளங்கடுங்கோ
௨௧. மாந்தரம்பொறையன் கடுங்கோ
௨௨. மாரிவெண்கோ
௨௩. முடங்கிக்கிடந்த நெடுஞ்சேரலாதன்
௨௪. யானைகட்சேய் மாந்தரஞ்சேரலிரும்பொறை
௨௫. வஞ்சன்

******************************

தமிழவைக்காலத்துச்சோழவரசர் சிலர் :

௧. இராசசூயம்வேட்ட பெருநற்கிள்ளி
௨. இலவந்திகைப்பள்ளித்துஞ்சிய நலங்கிள்ளி
சேட்சென்னி
௩. உருவப்பஃறேர் இளஞ்சேட்சென்னி
௪. ஏனாதி திருக்கிள்ளி
௫. கரிகாற்பெருவளத்தான்
௬. குராப்பள்ளித்துஞ்சிய பெருந்திருமாவளவன்
௭. குளமுற்றத்துத்துஞ்சிய கிள்ளிவளவன்
௮. கோப்பெருஞ்சோழன்
௯. செங்கணான்
௰. செருப்பாழி எறிந்த இளஞ்சேட்சென்னி
௧௧. தித்தன்
௧௨. துலைபுக்கபெரியோன் {சிபி}
௧௩. தூங்கெயிலெறிந்த தொடித்தோட்செம்பியன்
௧௪. நலங்கிள்ளி
௧௫. நல்லுருத்திரன்
௧௬. நெடுங்கிள்ளி
௧௭. நெய்தலங்கானல் இளஞ்சேட்சென்னி
௧௮. போரவைக்கோப்பெருநற்கிள்ளி
௧௯. மாவளத்தான்
௨௰. முடித்தலைக்கோப்பெருநற்கிள்ளி
௨௧. வேற்பஃறடக்கைப் பெருவிறற்கிள்ளி

*******************************

தமிழவைக்காலத்துப்பாண்டியவரசர் சிலர்.

௧. அண்டர்மகன் குறுவழுதி
௨. அறிவுடைநம்பி
௩. ஆரியப்படைகடந்த நெடுஞ்செழியன்
௪. இலவந்திகைப்பள்ளித்துஞ்சிய நன்மாறன்
௫. ஏனாதி நெடுங்கண்ணன்
௬. ஒல்லையூர் தந்த பூதப்பாண்டியன்
௭. கடலுள் மாய்ந்த இளம்பெருவழுதி
௮. கருங்கை ஒள்வாள் பெரும்பெயர்வழுதி
௯. கானப்பேரெயில்கடந்த உக்கிரப்பெருவழுதி
௰. கீரஞ்சாத்தன்
௧௧. குறுவழுதியார்
௧௨. கூடகாரத்துத்துஞ்சிய மாறன்வழுதி
௧௩. சித்திரமாடத்துத்துஞ்சிய நன்மாறன்
௧௪. தலையாலங்கானத்துச்செருவென்ற
நெடுஞ்செழியன்
௧௫. நம்பிநெடுஞ்செழியன்
௧௬. நல்வழுதி
௧௭. நிலந்தருதிருவின் நெடியோன்
௧௮. பல்யாகசாலை முதுகுடுமிப்பெருவழுதி
௧௯. பொற்கைப்பாண்டியன்
௨௰. மதிவாணன்
௨௧. மாலைமாறன்
௨௨. மாறன்வழுதி
௨௩. முடத்திருமாறன்
௨௪. வெள்ளியம்பலத்துத்துஞ்சிய பெருவழுதி
௨௫. வெற்றிவேற்செழியன்

*******************************

நன்றி. வணக்கம்.
உதவி : சங்ககாலவரசர் வரிசை நூல்

புறம் 163 - குமணனின் கொடையும் தமிழர்தம் கொடைப்பண்பும்

புறம் 163 - தமிழர்தம்கொடைப்பண்பு :

பாடியவர் : பெருஞ்சித்திரனார்.
பாடப்பட்டவர் : புலவரின் மனைவி.
திணை : பாடாண்.
துறை : பரிசில்.

நின் நயந்து உறைநர்க்கும், நீ நயந்து உறைநர்க்கும்,
பன்மாண் கற்பின்நின் கிளைமுத லோர்க்கும்,
கடும்பின் கடும்பசி தீர யாழநின்
நெடுங்குறி எதிர்ப்பை நல்கி யோர்க்கும்,
இன்னோர்க்கு என்னாது, என்னோடும் சூழாது,
வல்லாங்கு வாழ்தும் என்னாது, நீயும்
எல்லோர்க்கும் கொடுமதி-மனைகிழ வோயே!
பழந்தூங்கு முதிரத்துக் கிழவன்
திருந்துவேல் குமணன் நல்கிய வளனே.

விளக்கம் :

இவை முதிரமலை அரசன் குமணன் கொடுத்த செல்வங்கள். இவற்றை எல்லாருக்கும் கொடு. உன்னை விரும்பி வாழ்பவர்களுக்கும், நீ யாரை விரும்பி வாழ்கிறாயோ அவர்களுக்கும், உன்னைப் பின்பற்றிக் கற்றுக்கொண்டு வாழும் உன் சுற்றத்தார்களுக்கும், உனக்கும் உன் சுற்றத்தார்களுக்கும் பசி போக்கக் கடனாகக் கொடுத்து உதவியவர்களுக்கும், இன்னாருக்கு என்று கணக்குப் பார்க்காமல், என்னை எதும் கேட்காமல், எல்லாருக்கும் வழங்குவாயாக.

🌺🌺🌺🌺🌺🌺🌺🌺🌺🌺🌺🌺🌺🌺

இப்படி, மன்னனிடம் தான்பெற்ற பரிசிலை புலவர் பெருஞ்சித்திரனார், தன்மனைவியிடம் சொல்லி அனைவருக்கும் கொடுக்கச்சொல்கிறார். இவர் எத்தயை வறுமையில் இருந்தார் என்பதை இப்புறப்பாட்டிற்கு முன்புள்ள நான்கு பாடல்களில் எடுத்துக்கூறுவார். குப்பைக்கீரைகளைச் சமைக்கலாமென்றால், உப்பிற்குக்கூட வழியில்லை என்று மிகுந்த துயரத்துடன் பாடியிருப்பார். வறுமையும் புலமையும் சேர்ந்தேயிருக்குமென்பது மெய்யே போலும். அப்படிப்பட்ட வறுமையின்போதும் பெற்ற பரிசிலை அனைவருக்கும் கொடு என்று மனைவியிடம் கூறுகிறார். இதுவன்றோ தமிழர்தம் கொடைப்பண்பு. யாம்பெற்ற இன்பம் பெறுக இவ்வையகம் என்பது. எங்கே போனது அம்மனம்? இப்போது, யார்காலை வாரலாமென்று தான் நம்மக்கள் மாறிப்போயுள்ளனர்.

(நான் நான்காம் வகுப்பு படிக்கும்போது, இக்கதை எங்களுக்கு உரைநடைப்பாடமாக இருந்தது. அதில் நான், புலவர் பெருசித்திரனாராக நடித்திருந்தேன்😊).

இக்குமண வள்ளலே, தன் தம்பி இளங்குமணனின் சூழ்ச்சியால் காட்டிலிருந்தபோது, அண்ணனின் தலையை கொண்டுவருவோர்க்கு நூறாயிரம் பொற்காசு வழங்குவேனென்று சொல்லியிருந்த நேரத்தில், அதையறியாத புலவர் பெருந்தலைச் சாத்தனார் குமணனிடம் பாடிப்பரிசில்பெற வந்தபோது, பரிசில் தர என்னிடம் ஏதுமில்லை. என்னுயிர் மட்டுமே உள்ளது. என்தலைக்கு நூறாயிரம் பொன் விலை வைத்துள்ளான் என்தம்பி, என் தலையை வெட்டி என்தம்பியிடம் கொடுத்து பொன்னைப்பெற்றுக் கொள்ளுங்கள் என்று கூறியவன். வறியவர் துயர்தீர தன்னுயிரையும் கொடுக்கத் துணிந்தவன் குமணப்பெருவள்ளல்.
இவையனைத்தும் புறநானூற்றில் தொடர் பாக்களாக தொகுக்கப்பெற்றுள்ளன.

நன்றி. வணக்கம் 🙏

பன்னிருதிருமுறை சிறப்பைக்கூறும் பாடல்கள்

திருமுறைகள் அருளாளர்கள் சிறப்பை உணர்த்தும் சில அறியப்படாத பாடல்கள் :

மூவர் திருப்பதிகங்களையும் 'தேவாரம்' என்ற பெயரால் முதன் முதல் தெளிவாகக் குறிப்பிட்டு வழங்கியவர் சைவ எல்லப்ப நாவலர் ஆவர். இவர் தாம் பாடிய திருவருணைக் கலம்பகத்து காப்புச் செய்யுளில் சைவ சமய குரவர் நால்வரையும் போற்றிய பா.

"சைவத்தின் மேற்சமயம்வே
றிலையதில் சார்சிவமாம்
தெய்வத்தின் மேல்தெய்வம் இல்லெனும்
நான்மறைச் செம்பொருள்வாய்
மைவத்த சீர்திருத் தேவார
மும்திரு வாசகமும்
உய்வைத் தரஞ்செய்த நால்வர்
பொற்றாள் உயிர்த்துணையே."

- சைவ எல்லப்ப நாவலர்

திருவிளையாடற்புராணம்,நாட்டுச் சிறப்பு- 68.

தொண்டர் நாதனைத் தூதிடை விடுத்ததும், முதலை
உண்ட பாலனை அழைத்ததும், எலும்புபெண் உருவாக்
கண்ட தும்மறைக் கதவினைக் திறந்ததும் கன்னித்
தண்டமிழ்ச் சொலோ? மறுபுலச் சொற்களோ? சாற்றீர்!

- பரஞ்சோதியார்

வாக்கிற்கு அருணகிரி வாதவூ ரர்கனிவில்
தாக்கில் திருஞான சம்பந்தர்-நோக்கிற்கு
நக்கீர தேவர் நயத்திற்குச் சுந்தரனார்
சொற்குஉறுதிக்கு அப்பர்எனச் சொல்.

- இயற்றியவர் பெயர் தெரியவில்லை

மொழிக்கு மொழி தித்திப்பாக
மூவர் சொலும் தமிழ்

- என்று பாராட்டுகின்றார் தாயுமானவர்.

தேவாரத்தில் உள்ள இனிய இசையின் மாண்பை,

வெந்தழல் நீராமால் வெள்ளெலும்பு பெண்ணாமால்
வந்த மதவேழம் வணங்கிடுமால்-சந்தமெழப்
பாடுவார் உள்ளுருகிப் பாடும் தமிழிசைக்கு
நீடுலகில் உண்டோ நிகர்.

- இயற்றியவர் பெயர் தெரியவில்லை

திருமுறைகளைத் தொழுது போற்றிக் கற்று, உரை எழுதாமல் முன்னோர்கள் சென்று விட்டனர். திருமுறைகளைக் கற்ற நம் முன்னோர்களிடம், இக்காலத்தார் எங்ஙனம் உரை செய்வர் என்று,

அறம்உரைத் தானும் புலவன்;முப் பாலின்
திறம்உரைத் தானும் புலவன்; - குறுமுனி
தானும் புலவன்; தரணி பொறுக்குமோ
யானும் புலவன் எனில்.

- இயற்றியவர் பெயர் தெரியவில்லை

நால்வர் நான்மணி மாலையில்

திருவா சகம்இங்கு ஒருகால் ஓதின்,
கருங்கல் மனமும் கரைந்துஉகக் கண்கள்
தொடுமணற் கேணியின் சுரந்துநீர் பாய
மெய்ம்மயிர் பொடிப்ப விதிர்விதிர்ப்பு எய்தி
அன்பர் ஆகுநர் அன்றி
மன்பதை உலகின் மற்றையர் இலரே.

- சிவப்பிரகாச சுவாமிகள்

உதவி: வலைத்தளம்
தொகுப்பு: தமிழ் கோ விக்ரம்

நன்றி. வணக்கம்.

தமிழ் வாழ்க

செல்வத்துப்பயனே ஈதல் - புறம் 189

செல்வத்துப்பயனே ஈதல் : 🙏 புறம் 189

செல்வர்க்கு செல்வம் வாய்த்தமை ஏனெனில், வறியவர்க்கு ஈயும் பொருட்டேயாகும்.

பாடியவர் : மதுரைக் கணக்காயனார் மகனார் நக்கீரனார்
திணை : பொதுவியல்
துறை : பொருண்மொழிக் காஞ்சி
(செல்வத்துப் பயனே ஈதலென்பதை வலியுறுத்தும் செய்யுள் இது.)

தெண்கடல் வளாகம் பொதுமை இன்றி
வெண்குடை நிழற்றிய ஒருமை யோர்க்கும்
நடுநாள் யாமத்தும் பகலும் துஞ்சான்
கடுமாப் பார்க்கும் கல்லா ஒருவற்கும்
உண்பது நாழி உடுப்பவை இரண்டே
பிறவும் எல்லாம் ஓரொக் கும்மே
(அதனால்) செல்வத்துப் பயனே ஈதல்
துய்ப்பேம் எனினே தப்புந பலவே.

விளக்கம் :

ஒருவன் தெளிந்த கடல் சூழ்ந்திருக்கும் உலகம் அனைத்தையும் பிறருக்கு உரிமை இல்லாமல் தனக்கே உரியதாய் தன் வெண்கொற்றக் குடைக்கீழ்க் கொண்டுவந்து ஆண்டு ஆனுபவித்துக் கொண்டிருக்கிறான்.

மற்றொருவன் பகல் இரவு என்று பாராமல் நள்ளிரவிலும் உணவுக்கு வேட்டையாட விலங்கினைப் பார்த்துக்கொண்டிருக்கிறான். என்று வைத்துக்கொள்வோம்.

யாராய் இருந்தால் என்ன? அவன் உண்பது ஒரு படி உணவு. உடுத்திருப்பவை மேலாடை, கீழாடை என்று இரண்டே துணி. பிறவற்றை எண்ணிப் பார்த்தாலும் இருவர் நுகர்வும் ஒன்றாகவே உள்ளது. அப்படி இருக்கும்போது செல்வத்தைச் சேர்த்துவைத்து என்ன செய்யப் போகிறோம். துய்க்கலாம் என்றால் மிஞ்சித் தப்பிவிடுமே. அதனால் செல்வத்துப் பயன் ஈதல் ஒன்றே.

நன்றி. வணக்கம் 🙏

Monday, September 23, 2019

சங்கவிலக்கியத்தில் ஆதன் :

அண்மையில் கீழடி அகழ்வாய்வின் பானையோடுகளில் எழுதிய பெயர்களில் ஆதன் என்பதும் ஒன்று. இப்பெயர் தமிழவை நூல்களில் பலவிடங்களிலுண்டு. பெரும்பாலும் சேரமரபினரின் பெயர்களே ஆதன் என்றுள்ளன. ஆனால், பாண்டி நாட்டில் கிடைத்த தொல்சான்றில் சேரப்பெயரான ஆதனெனும் பெயர் நம்முள் பலவினாக்களைத் தொடுக்கிறது. எது எவ்வாறோ இருக்கட்டும். இப்பெயர், சங்கநூல்களில் யாங்கெல்லாம் குறிப்பிட்டப்பட்டுள்ளது என்பதை எடுத்தியம்பும் சிறுபதிவே இது. அடியனுக்குக் கிடைத்த சிலசான்றுகளை உமக்கும் அறிவிக்கிறேன்.

ஆதன் பெயர்க்காரணம் :

மூச்சுக்காற்றில் உள்ளிழுக்கும் காற்று, வெளிவிடும் காற்று என்று இரண்டு வகையுண்டு. உள்ளிழுக்கும் காற்றிலுள்ள உயிர்வளி உடலில் ஊறிய சத்தை எரிக்க உதவுகிறது. உதவும் காற்று நமக்கு ஆகும் காற்று. ஆகும் காற்று ஆதல் காற்று. ஆதல் காற்றை ஆதன் என்பது தமிழ். ஆதன் என்பது உயிர்வளி. உயிர் என்றும் பொருளாகும்.

வெளிவிடும் காற்று அவிந்த காற்று. எரிந்தது அவிந்தால் கரி. அதனால் வெளிவிடும் காற்றைக் கரி+அமில வாயு என்பர். தமிழ் அவிந்த காற்றை அவினி என்று குறிப்பிடுகிறது.

ஆதன், அவினி என்னும் பெயர்கள் இவ்வாறு தோன்றின. இவற்றை மக்களும் தமக்குப் பெயராக்கிக்கொண்டனர்.

ஆதன் பெயர்கள் :

1. சேரமான் பெருஞ்சோற்று உதியன் சேரலாதன் - புறம் 2

2. சேரமான் செல்வக்கடுங்கோ வாழியாதன் - புறம் 8

3. சேரமான் குடக்கோ நெடுஞ்சேரலாதன் - புறம் 62

4. பெருஞ்சேரலாதன் - புறம் 65

5. ஆதன் அழிசி - ஒல்லையூர்தந்த பூதப்பாண்டியனின் 5 நன்பர்களுள் ஒருவன் - புறம் 71

6. ஆதன் - ஓரியின் தந்தை - புறம் 153

7. நெடுவேள் ஆதன் - போந்தைப்பட்டினம் என்னும் குறுநில மன்னன் - புறம் 338

8. நல்லியாதன் - ஓய்மான் நல்லியக்கோடன் - புறம் 376

9. ஓய்மான்வில்லியாதன் - இலங்கையரசன் - புறம் 379

10. ஆதனுங்கன் - வேங்கடநாட்டு அரசன் - புறம் 389

11. ஆதன் - வாட்டாற்று எழினியின் மகன் - புறம் 396

12. ஆடுகோட்பாட்டச்சேரலாதன்

13. இமயவரம்பன் நெடுஞ்சேரலாதன்

14. முடங்கிக்கிடந்த நெடுஞ்சேரலாதன்

15. ஆதனூர் - "மேற்காநாட்டு ஆதனூர்" - திருட்தொண்டர் மாக்கதை.

*******************

நன்றி. வணக்கம்.

பதிவிற்கு உதவிய நூல்கள் :
1. புறநானூறு நூல்
2. செந்தமிழ் சொற்பிறப்பியல் பேரகரமுதலி
3. சங்ககாலவரசர் வரிசை நூல்
4. பெரியபுராணம்.

தொகுப்பு : தனித்தமிழாளன்

Wednesday, September 18, 2019

உதயசூரியன் சின்னத்தை உருவாக்கிய இரட்டைமலையார்

உதயசூரியன் சின்னத்தை உருவாக்கிவர் தாத்தா இரட்டைமலை சீனிவாசனார் :

தற்காலத்தமிழ்த்தேசியர்க்கு திராவிட அடிமை.

உதயசூரியன் சின்னம் யார் சிந்தனையில் முதன் முதலில் உதயமானது என்று தேடிப்போனால் கண்டடையும் முகம் இரட்டைமலை சீனிவாசனார்.

1929-ம் ஆண்டு செங்கல்பட்டில் நடந்த முதலாவது சுயமரியாதை இயக்க மாநாட்டுக்காக ஒரு கொடி தயார் செய்யப்பட்டது. தியாகராயர், டி.எம்.நாயர், பனகல் அரசர், பெரியார் உருவம் தாங்கிய அந்தக் கொடியில் சூரியன் உதிப்பதுபோல இருக்கும். ஆனால், இரண்டு மலைகளில் இருந்து உதயம் ஆவதைப் போன்ற சின்னம் ரெட்டைமலை இயக்கத்தைச் சார்ந்தவர்கள் உருவாக்கியதாக அமைந்திருந்தது.

‘சென்னை மாகாண செட்யூல்டு வகுப்பினர் ஃபெடரேஷன்’ என்ற அமைப்பை 1936-ல் இவர் தொடங்கியபோது அந்த அமைப்புக்கு சூரியன்தான் சின்னமாக அமைந்து இருக்கிறது. சூரியனைவைத்து கொடி தயாரித்துள்ளார். மாநாடுகளில் அந்தக் கொடியையே ஏற்றியுள்ளார். அதனால், அந்தக் கட்சிக்கு ‘சூரியக் கட்சி’ என்ற பெயரும் இருந்து உள்ளது.

சுவர் விளம்பரங்களில் பார்த்திருப்பீர்கள், இரண்டு மலைகளுக்கு நடுவே சூரியன் உதயமாவதைப்போல. ரெட்டைமலை சீனிவாசனின் பெயரில் இருந்த இரட்டை மலைகளை வரைந்து அதில் இருந்து சூரியன் உதயமாவதைப்போல அந்தக் காலத்தில் வடிவம் கொடுத்துள்ளார்கள். இந்த அமைப்புக்காக குடியாத்தம் பகுதியில் இருந்து எஸ்.பி.பாலசுந்தரமும், ஜெ.ஜெ.தாசும் இணைந்து 1941-ல் ஓர் இதழ் தொடங்கினார்கள். இந்த இதழின் பெயர் ‘உதயசூரியன்.’

“உதயசூரியன் இதழில்தான் இரண்டு மலைகளுக்கு நடுவில் உதயசூரியன் இருப்பது போன்ற சின்னம் வரையப்பட்டது’’ என்கிறார் ரெட்டைமலை சீனிவாசனின் பேத்தி முனைவர் நிர்மலா அருட்பிரகாசு.

ரெட்டைமலை சீனிவாசன் மனதில் உதயசூரியன் எப்படி உதித்தது? இளம் பருவத்தில் இருந்தே தினமும் சூரியனை வணங்கும் பழக்கத்தை விடாமல் கடைப்பிடித்தவர் அவர். அது அவரது இறை நம்பிக்கை.

பட்டியல் இனத்து மக்களுக்கு ‘ஹரிஜன்’ என்று புதுப் பெயர் வைத்து கோயிலுக்குள் அழைத்துச் செல்லும் ஆலய நுழைவுப் போராட்டத்தை காந்தியின் நிர்மாணத் திட்டங்களின் அடிப்படையில் காங்கிரஸ் கட்சி முன்னெடுத்தபோது, அனைவரையும் அதிர்ச்சி அடைய வைக்கும் வகையில் அதனை எதிர்த்தார் ரெட்டைமலை சீனிவாசன்.

‘‘ஒரு காலத்தில் இந்தக் கோயில்கள் எல்லாம் எங்கள் கட்டுப்பாட்டில் இருந்தவை. அதில் இருந்து எங்களை விரட்டிவிட்டு கைப்பற்றிக்கொண்டீர்கள். எங்களுக்குச் சொந்தமான கோயில்களைத் திரும்பக் கேட்காமல் அதனுள் நுழைய மட்டும் அனுமதி கேட்பது என்ன நியாயம்?’’ என்று கேட்டார் ரெட்டைமலை சீனிவாசன். ‘‘ஆலயத்துக்குள் அனுமதித்தால் மட்டும் சாதி இழிவு போய்விடாது” என்றும் சொன்னார்.

சாதிக் கொடுமையில் இருந்தும், தீண்டாமைத் தீ வினையில் இருந்தும் விடுபட வேண்டுமானால், இந்து மதத்தில் இருந்து மாற்று மதத்துக்கு மாற வேண்டும் என்று டாக்டர் அம்பேத்கர் சொன்னபோது, காந்தி உள்ளிட்ட பலரும் எதிர்த்தார்கள். அனைவரையும் அதிர்ச்சி அடைய வைக்கும் வகையில் ரெட்டைமலை சீனிவாசனும் எதிர்த்தார்.

‘‘நாம்தான் இந்து மதத்தில் இல்லையே. அவர்ணஸ்தர் அதாவது, வருணம் அற்றவர் ஆயிற்றே! இந்துக்களே அல்லாத நாம் இந்து மதத்தில் இருந்து எப்படி விலக முடியும்?’’ என்று கேட்ட இவர், ‘‘ஆதி திராவிடர் மதம் மாறுவது தேவையற்றது. எந்த மதத்துக்கு மாறினாலும் இழிவுபோகாது’’ என்று சொன்னார்.

இளமைக்காலம் முதல், தான் அனுபவித்த தீண்டாமைக் கொடுமையே அவரை இப்படி யோசிக்க வைத்தது. இந்தச் சமூக அழுக்கைத் துடைப்பதற்காகவே 1890-ம் ஆண்டு திராவிட மகாசன சபையை பண்டித அயோத்திதாசருடன் இணைந்து தொடங்கினார். பிறகு தனது அமைப்பின் பெயரை, ‘ஆதிதிராவிட மகாசன சபை’ என மாற்றினார். ‘பறையன்’ என்ற இதழைத் தொடங்கினார். ‘‘எந்த வார்த்தையைச் சொல்லி இழிவுபடுத்துகிறார்களோ, அதையே ஆயுதமாகப் பயன்படுத்த வேண்டும்’’ என்றார்.

1894-ல் இவர் அனுப்பிய விரிவான மனுதான், இந்தியாவில் குறிப்பாக தமிழகத்தில் மிகமோசமான சாதி, தீண்டாமைக் கட்டமைப்பு தலைவிரித்து ஆடுகிறது என்பதை பிரிட்டிஷ் அரசுக்கு உணர்த்தியது. இதன்பிறகு உருவாக்கப்பட்டதே தொழிலாளர் நல ஆணையம். இதுதான் பட்டியல் இன மக்களுக்குக் கல்வி நிலையங்கள், குடியிருப்புகள், மனைகள், விவசாய நிலங்கள் போன்ற அடிப்படை வசதிகள் கிடைக்க வழி வகுத்தது.

இந்தக் கோரிக்கைகளை நேரடியாக பிரிட்டிஷாரிடம் சொல்வதற்காக லண்டன் பயணமானார். லண்டன் செல்வதற்கு முன் தென்னாப்பிரிக்கா போனார். உடல்நலம் பாதிக்கப்பட்டதால் அங்கேயே தங்கிவிட்டார். அங்கு காந்திக்கும் இவருக்கும் நட்பு ஏற்பட்டது. அனைவரும் பார்த்து இருப்பீர்கள், எம்.கே.காந்தி என்று தமிழில் காந்தி போட்ட கையெழுத்தை. அதைக் கற்றுக்கொடுத்தவர் இந்த ரெட்டைமலை சீனிவாசன்தான். 20 ஆண்டுகளுக்குப் பின் இந்தியாவுக்கு மீண்டும் வந்தவர், முன்னிலும் உற்சாகமாகப் போராடத் தொடங்கினார்.

வரலாற்று முக்கியத்துவம் வாய்ந்த வட்டமேஜை மாநாட்டில் பங்கெடுத்தவர் ரெட்டைமலை சீனிவாசன். ஜார்ஜ் மன்னரையும் ராணியையும் வின்சர் கேஸல் மாளிகையில் ரெட்டைமலை சீனிவாசன் சந்தித்தார். மன்னர் கைகொடுத்தார். சீனிவாசன் கை கொடுக்கவில்லை. ‘‘என்னைத் தொட்டால் உங்களுக்கு தீட்டுப் பட்டுவிடும்’’ என்றார் இவர். ‘‘அப்படியா... தீண்டாமை என்றால் என்ன?’’ என்று ஜார்ஜ் மன்னர் கேட்டார். ‘‘எங்கள் நாட்டில் மேல்சாதிக்காரன், கீழ்சாதிக்காரனை தொடமாட்டான். தொட்டால் தீட்டாகிவிடும்’’ என்றார்.

‘‘அப்படியானால் கீழ்சாதிக்காரன் தெருவில் விழுந்தால் மேல்சாதிக்காரன் தொட்டுத் தூக்கமாட்டானா?’’ என்று ஜார்ஜ் மன்னர் திருப்பிக் கேட்டார். ‘‘தூக்க மாட்டான்’’ என்றார் ரெட்டைமலை சீனிவாசன். ‘‘அப்படி நடக்க எனது ராஜ்யத்தில் நான் விடமாட்டேன்’’ என்ற ஜார்ஜ், ரெட்டைமலை சீனிவாசனின் இரண்டு கையையும் பிடித்துக் குலுக்குகிறார். ‘‘அன்புக்குரிய இந்திய மக்கள் வளமுடன் ஆனந்தமாக வாழ வழிகாட்டிய மாமனிதர்களின் வரலாற்றில் உங்கள் பெயரும் இடம்பெறும்’’ என்று அப்போது ஐந்தாம் ஜார்ஜ் மன்னன் சொன்னது இவரைத்தான்.

இப்படி வாழ்நாள் முழுவதும், சாதி தீண்டாமைக் கொடுமைகளுக்கு எதிராகப் போராடியவர், திராவிட என்னும் பெயரில் புரட்சி செய்ததால், தற்கால தமிழ்த்தேசியர்கள் பாங்கில் போற்றவேண்டுமென்றால் திராவிட அடிமை இரட்டைமலை சீனிவாசன் நினைவைப்போற்றுவோம்.

*******
நன்றி, விகடன்.

தனித்தமிழாளன்

Tuesday, September 17, 2019

பெரியாரைப்பற்றி தமிழறிஞர்கள் கூறியது

பெரியாரைப்பற்றி தமிழ்த்தேசியத்தந்தை பாவலரேறு பெருஞ்சித்திரனார் கூறியது :

பெரும்பணியைச் சுமந்த உடல்
பெரும்புகழைச் சுமந்த உயிர்
“பெரியார்” என்னும்
அரும்பெயரைச் சுமந்த நரை!
அழற்கதிரைச் சுமந்த மதி!
அறியாமை மேல்
இரும்புலக்கை மொத்துதல் போல்
எடுக்காமல் அடித்தஅடி!
எரிபோல் பேச்சு!
பெரும்புதுமை! அடடா, இப்
பெரியாரைத் தமிழ்நாடும்
பெற்றதம்மா!

மணிச்சுரங்கம் போல்அவரின்
மதிச்சுரங்கத் தொளிர்ந்தெழுந்த
மழலைக் கொச்சை!
அணிச்சரம் போல் மளமளவென
அவிழ்கின்ற பச்சை நடை!
ஆரியத்தைத்
துணிச்சலுடன் நின்றெதிர்த்துத்
துவைத்தெடுத்த வெங்களிறு!
தோல்வியில்லாப்
பணிச்செங்கோ! அடடா, இப்
பகுத்தறிவைத் தமிழ் நாடும்
சுமந்த தம்மா!

உரையழ கிங்கெவர்க்குவரும்?
உடலழகிங் கெவர்பெற்றார்?
ஒளிர்முகத்தின்
நரையழகிங் கெவர்க்குண்டு?
நாளெல்லாம் வாழ்க்கையெல்லாம்
நடை நடந்து
திரையுடலை, நோயுடலைச்
சுமந்துபல ஊர்திரிந்து
தொண்டு செய்த
இரைகடலை அடடா இவ் வெரியேற்றைத் தமிழ்நாடும்
இழந்ததம்மா!

எப்பொழுதும் எவ்விடத்தும்
எந்நேரமும் தொண்டோ டினைந்த பேச்சு! முப்பொழுதும் நடந்தநடை!
முழுஇரவும் விழித்தவிழி!
முழங்குகின்ற
அப்பழுக்கி லாதவுரை!
அரிமாவை அடக்குகின்ற அடங்காச் சீற்றம்! எப்பொழுதோ, அடடா, இவ்
வேந்தனையித்
தமிழ்நாடும் ஏந்தும் அம்மா?

பெற்றிழந்தோம், பெரியாரை!
பெற்றிழந்தோம்! அவரின்
பெருந்த லைமை
உற்றிழந்தோம்; உணர்விழந்தோம் உயிரிழந்தோம்; உருவிழந்தோம்!
உலையாத் துன்பால்
குற்றுயிராய்க் குலையுயிராய்க் கிடக்கின்ற தமிழினத்தைக்
கொண்டு செல்லும்
தெற்றுமணித் தலைவரினை,
அடடா, இத் தமிழ்நாடும்
நெகிழ்ந்ததம்மா!

பெரியாரைப் பேசுகின்றோம்;
பெரியாரை வாழ்த்துகின்றோம்;
பீடு, தங்கப் பெரியாரைப் பாடுகின்றோம்; பெரியார்நூல் கற்கின்றோம்;
பீற்றிக் கொள்வோம்!
உரியாரைப் போற்றுவதின் அவருரைத்த பலவற்றுள் ஒன்றை யேனும்
சரியாகக் கடைப்பிடித்தால்
அடடா, இத் தமிழ்நாடும்
சரியாதம்மா!

- பாவலரேறு பெருஞ்சித்திரனார். 1973

*************

ஒளியைப் பரப்பிய ஊழித் தலைவராம்
அளிசேர் எங்கள் அருமைப் பெரியார்
பேசிய பேச்சுகள் நச்சுகள் என்றால் - ஊசிய
கருத்தை உரைத்த புராணங்கள், வேத அழுக்குகள், பொய்ம்மை விளக்கங்கள் - ஊதை
உளுத்தைகள் நச்சிலா உரைகளா?

*************

பெரியார் உணர்வினைப்பாவேந்தர் பீடினை அறியாத் தமிழராய், ஐயகோ, அழிகிறோம்! தமிழர் இனமே! தாழ்ந்துபோம் இனமே! : இமியும் பொறுத்திடற் கில்லை! இனியேனும் அமிழா உணர்வினால் ஆர்ந்துடன் எழுகவே!

- பாவலரேறு பெருஞ்சித்திரனார் - 1983

*******************

பெரியாரைப்பற்றி தமிழ்த்தேசியக்கவிஞர் புரட்சிக்கவிஞர் பாரதிதாசனார் :

அவர்தாம் பெரியார் - பார்
அன்பு மக்கள் கடலின் மீதில்
அறிவுத் தேக்கம் தங்கத் தேரில் (அவர்தாம்)

மக்கள் நெஞ்சின் மலிவுப் பதிப்பு
வஞ்சகர்க்கோ கொடிய நெருப்பு
மிக்க பண்பின் குடியிருப்பு
விடுதலைப்பெரும்படையின்தொகுப்பு (அவர்தாம்)

தொண்டு செய்து பழுத்த பழம்
தூய தாடி மார்பில் விழும்
மண்டைச் சுரப்பை உலகுதொழும்
மனக்குகையில் சிறுத்தை எழும் (அவர்தாம்)

- கனக சுப்புரத்தினம்

***************

பெரியாரின் பார்ப்பானிய எதிர்ப்பைப்பற்றி தமிழ்த்தேசியக்கவிஞர் பாவேந்தர் பாரதிதாசன் :

பார்ப்பனியம் மேலென்று சொல்லிச் சொல்லிப்
பழையயுகப் பொய்க்கதைகள் காட்டிக் காட்டி
வேர்ப்புறத்தில் வெந்நீரை வார்த்து வார்த்து
மிகப்பெரிய சமூகத்தை இந்நாள் மட்டும்
தீர்ப்பரிய கொடுமைக்குள் ஆக்கி வைத்த
செயல்அறிந்து திடுக்கிட்ட தலைவா! உன்னை
ஊர்ப்புறத்து மாந்தரெலாம் உணருங் காலை
உவக்கின்றாய் உன்பணியில் ஓய்ந்தாய் இல்லை
ஆர்ப்பரித்தே பணிசெய்த தன்மை கண்டோம்
அப்பணிக்கே நாங்கள்உனை வணக்கம் செய்தோம்.

- பாவேந்தர்

*****************

பெரியாரைப்பற்றி தமிழ்த்தேசியர் மொழிஞாயிறு தேவநேயப்பாவாணர் :

தமிழன் விடுதலை தலைவர் மூவருள்
அமரும் ஈகையர் அறநூல் வள்ளுவர்
தமியின் மொழியினர் தவநன் மறைமலை
இமிழ்தன் மானியர் இராமசாமியார்

- தேவநேயர்

தமிழினத்தை காக்க, முன்னேற்ற மூவர் தோன்றினர்கள் அவர்கள் திருவள்ளுவர், மறைமலையடிகள், மற்றும் பெரியார்.

**************

பெரியாரைப்பற்றி தனித்தமிழியக்கத்துத் தந்தை மறைமலையடிகள் கூறியது :

நன்றி. வணக்கம்

தனித்தமிழாளன்